fauldetueil

Fauldetueil, m. acut. Est une espece de chaire à dossier et à accouldoirs, ayant le siege de sangles entrelassées, couvertes de telle estoffe qu'on veut, laquelle se plie pour plus commodément la porter d'un lieu à autre, et est chaire de parade, laquelle on tenoit anciennement aupres d'un lict de parade. Le mot luy peut estre donné de cestuy-cy Faulde, qui signifie giron, dont le Languedoc use encore (si fait le François de Faulder, comme est dit en son lieu) parce que telles chaires, qui estoient de bas siege et creux, avoient le siege mol, aisé, et un peu creux, en forme de giron. Au grand Ceremonial de l'Eglise il est latinisé par Faldistorium, et prins pour la chaire ou seance de respect et d'honneur où le Cardinal qui celebre la Messe, se repose aux intervalles qui luy permettent se retirer de l'autel, et est baillé pour accouldoir à l'Empereur, estant en l'Eglise S. Pierre pour faire son oraison: mais est sans dossier et sans accouldoirs, et toute rase, et en cela differente du Fauldetueil, qui a esté cy dessus descrit. {{o=d'escrit}} Et selon ladite derivation de Faulde, pour Gremium, peut estre cette chaire sans accouldoirs et sans dossier. La façon originaire du Fauldetueil, pour estre le giron de l'homme ainsi fait, qui sert aussi d'accouldoir au Pape quand il est à genoux en oraison à l'Eglise, ou dans sa chappelle. L'Italien dit Faldistoro.

Le Roy fut assis au Fauldetueil tout doré, là où la table estoit mise, Jourdain de Blaves.

Thresor de la langue françoyse. Jean Nicot.